Quién somos

Somos APIAST, l'Asociación de Profesionales de la Ilustración d'Asturies, entidá ensin ánimu d'arriquecimientu, qu'empecipia la so actividá oficialmente en 2024 impulsada pola necesidá de xunir fuerces, y que nun para de medrar.

Compartimos un espaciu onde persones apasionaes por esta disciplina creativa y profesionales de la ilustración n'activu collaboramos de forma voluntaria para construyir un futuru dignu pal nuestru sector: visibilizar, defender y dignificar l'oficiu de la ilustración, tresformándola d'un gremiu davezu solitariu a un oficiu con voz propia y sofitu coleutivu.

Creemos nuna idea cenciella pero poderosa: “la xunión fai la fuerza”.

Conexón nacional y internacional

P’asegurar que la voz de los y les profesionales de la Ilustración d'Asturies llegue lo más lloñe posible, formamos parte de les redes de representación más importantes:

  • A nivel nacional: formamos parte de la Xunta Directiva de FADIP (Federación d'Asociaciones d'Ilustración Profesional), xuniendo los nuestros oxetivos a los de compañeros y compañeres de Madrid, Cataluña, Galicia, País Vascu, Valencia y Aragón.
  • A nivel européu: una de les nuestres representantes dientro de FADIP, forma parte de la Xunta Directiva de la European Illustrators Federation (EIF), participando de mou activu nel diálogu con asociaciones homólogues de toa Europa.

El nuesu motor ye'l sofitu ente nós. APIAST ye, primero de too, una rede de collaboración diseñada pa que nengún ilustrador o ilustradora d’Asturies tenga qu'enfrentar los desafíos del oficiu de mou aislláu.

ilustraciones-peques1

La nuestra ética profesional

N’APIAST tenemos bien claro'l nuestru papel. Pa protexer la integridá la nuestra profesión y de quien pertenez a ella, empobinámonos con estos principios:

Independencia y tresparencia: nun somos una axencia de representación, polo que nun facemos servicios de seleición de profesionales pa empreses, alministraciones o particulares.

Igualdá d'oportunidaes:: si una entidá o particular contauta cola asociación buscando servicios d'ilustración, comunicamos la propuesta peles nuestres canales oficiales a toles personar socies garantizando asina que toes elles tengan la mesma oportunidá de participar.

Escaparate direutu: magar que nun somos intermediarios, facilitamos el contactu direutu a les alministraciones, empreses o particulares coles profesionales de la ilustración que tean buscando, al traviés del nuestru Direutoriu de persones socies.

Cultura de collaboración: camudamos la rivalidá pol compañerismu. Creemos que l'ésitu d'una ilustradora o ilustrador d’Asturies ye un ésitu para tol sector. Compartimos recursos, duldes y sofitu porque somos collacios y collacies d'oficiu y non competencia.

Defensa de la creación humana: posicionámonos de mou firme a favor de la creatividá y los derechos d'autoría. Nun sofitamos l'usu d'Intelixencia Artificial xenerativa en nenguna parte del procesu creativu porque:

  • NUN pue considerase ferramienta: una ferramienta enancha capacidaes; nun les sustitúi.
  • Les plataformes de IA-G operen estrayendo de mou illegal obres protexíes por derechos d'autoría.

Defendemos la ilustración como una disciplina artística humana onde l'alma, la imaxinación y l'autoría han permanecer siempre nel centru.

Xúnite a APIAST, xuntes somos más fuertes

Súmate a una comunidá de más de 80 ilustradores y collabora pa construyir un futuru dignu pal sector. Namás precises tener dalgún venceyu cola ilustración y con Asturies.